Өдөржин ажлын ачаалалд дарагдаж, авто замын түгжрэл, утаа гээд бухимдах зүйл бишгүй л бий. Гэвч амьдралын чухал нэгэн хэсэг болох гэрээ өөрийн хүссэнээр тохижуулж, амар амгалан, тайвшралыг үргэлж мэдэрч болно. Жижиг зайг ч зөв төлөвлөж, талбайг илүү ашигтай байдлаар зохион байгуулж мэргэжлийн хүний тусламжтайгаар хүссэн орчноо бүтээхэд тийм хэцүү биш.  

Саруулхан санагдуулах завсрын цайвар өнгөнүүд интерьерт зонхилох бөгөөд хэт уйтгартай болгохгүйн тулд уран зураг, чимэглэл ашиглаж ханандаа гэрэл зургуудаа өлгөж гоёмсог харагдуулж болдог.

Хэчнээн сайн зураг, гоё дизайн байсан ч төгс биеллээ олохын тулд захиалагчаас тодорхой шаардлага болон хөрөнгө шаарддаг. Өөрөөр хэлбэл таны зүгээс үзүүлэх төсөв бага байх тохиолдолд ихэвчлэн дизайнерууд хямд материалыг сонгодог. Ингэснээр дизайнераас үл шалтгаалсан чанарын асуудал яригддаг. Тиймээс өөртөө оруулж буй хөрөнгө оруулалт гэж үзэн дизайнеруудын чадварыг бүрэн илэрхийлсэн санхүүг сайн тохиролцох нь чухал юм.